(1924) A mi queridu amigu Pepito Bernardo
Mio queridísimu amigu:
voy a 'scribite 'sta carta,
i sé que te 'strañará
un pocu, qu'asi lo faga.
Pos ye'l casu qu'isti dia
taba leendo'l programa
de les fiestes de Santiago
cuandu ¡zás! mió vista trapa
'n un escritu que pa ti
yo non sé quien te lu manda
(pos non conozcu a Solanu
nin sé per onde s'afaya)
vi escribío en lletres gordes
el nome de mio Cesária...
Yo ensiguida miré atentu
pa ver de qué se trataba:
pos tú que ya me conoces
i sabes qu'esa rapaza,
ye la que me quita'l sueñu
la que m'arroba la calma,
la que me trai alloriáu
al reor de so quintana,
la q1ue me fai dar mil güeltes
antes de dir pa la cama,
i fáime suañar dispiertu
que ye comu 'star en Babia,
tinía qu'enteresame
lo que d'ella se falara.
Vi que diola Solanu
a los amigus de Sama,
un abrazu a Soldevilla
i utru apretáu a Cesaria.
Siendu tú de los amigus
a quien él lo incomendaba
i teniendu yo contigo
la soficiente confianza,
non t'ha de chocar te diga
que tú 'l encargu non fagas
porque 'si abrazu fuera
el arrancama la 'ntraña
Que abraces a Soldevilla
too lo que te dé la gana
(aunque te cueste trabayu
poder arrodiái la 'spalda,
porque con tanta barriga
ni con un cordel s'abarca)
ye lo qu'a mí ná m'emporta,
peru abrazar a Cesária...
¡por Dios que yo non lo sepa!
que non pase tal disgracia.
Teniendo yo tantu celu
i tantu amor en mió alma,
si dalgún i da un abrazu,
si unu quixera besala,
el mundu se vien a baxo
báltiolu yo con mió rabia.
Fuera tal el coraxe
que de mió pechu soltara,
que nin ciclón, nin tormenta,
nin terremotu, nin nada,
se podría comparar,
¡non puedi haber comparanza!
con lo que pué soceder
si dalgún mozu l'abraza
Por esu te digo Pepe
que tal encargu non fagas,
pos ya sabes que con él
desfazíesme la entraña.